ບົດກ່າວເປີດ ກອງປະຊຸມສະໄໝ ວິສາມັນສະພາແຫ່ງຊາດ

ບົດກ່າວເປີດ

ກອງ​ປະຊຸມສະ​ໄໝ​ວິສາມັນ​ສະພາ​ແຫ່ງ​ຊາດ ຊຸດ​ທີ VII

ຂອງ​ທ່ານ ນາງ ປານີ ຢາ​ທໍ່​ຕູ້, ປະທານ​ສະພາ​ແຫ່ງ​ຊາດ

ວັນ​ທີ 18/10/2012

–      ຮຽນ: ທ່ານ ທອງ​ສິງ ທຳ​ມະ​ວົງ, ກຳມະການ​ກົມກ​ານ​ເມືອງ​ສູນ​ກາງ​ພັກ, ນາຍົກລັດຖະມົນຕີ​ແຫ່ງ ສປປ ລາວ ທີ່​ນັບຖື

–      ບັນດາ​ທ່ານ​ຜູ້ນຳພັກ-ລັດ ທີ່​ນັບຖື

–      ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ

–      ທ່ານ​ແຂກ​ຜູ້​ມີ​ກຽດ ທີ່​ນັບຖື ​ແລະ ຮັກ​ແພງ!

ມື້​ນີ້,​ ກອງ​ປະຊຸມ​ສະ​ໄໝ​ວິສາມັນ​ຂອງ​ສະພາ​ແຫ່ງ​ຊາດ ຊຸດ​ທີ VII, ​ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ ​ເພື່ອ​ພິຈາລະນາ ​ແລະ ຕົກລົງ​ບັນຫາ​ສຳຄັນ​ຂອງ​ຊາດ, ​ໃນ​ທ່າມກາງ​ບັນຍາກາດ​ທີ່​ທົ່ວ​ພັກ, ທົ່ວ​ປວງ​ຊົນ​ລາວ​ທັງ​ຊາດ​ມີ​ຄວາມເບີກບານ​ມ່ວນ​ຊື່ນ ຕໍ່​ຜົນສຳ​ເລັດ​ຂອງ​ກອງ​ປະຊຸມ​ການ​ເປັນ​ຄູ່​ຮ່ວມ​ລັດຖະສ​ະພາ​ອາຊີ-​ເອີຣົບ ຄັ້ງ​ທີ 7 ທີ່​ນະຄອນຫຼວງ​ວຽງຈັນ, ຊ​ຶ່ງສະພາ​ແຫ່ງ​ຊາດ​ເປັນ​ເຈົ້າພາບ ​ແລະ ​ໃນ​ບັນຍາກາດ ​ແຫ່ງ​ການ​ສ້າງຂະ​ບວນການ​​ເພື່ອ​ຂ່ຳນັບ​ຮັບ​ຕ້ອນ​ວັນ​ສະຖາປະນາ ສປປ ລາວ ຄົບ ຮອບ 37 ປີ, ກໍ່​ຄື​ ການ​ກະກຽມ ​ເງື່ອນ​ໄຂ ​ແລະ ຄວາມ​ພ້ອມດ້ານ​ຕ່າງໆ​ໃຫ້​ແກ່​ການ​ເປັນ​ເຈົ້າພາບ ຈັດ​ກອງ​ປະຊຸມ​ສຸດ​ຍອດອາຊີ-​ເອີຣົບ ຄັ້ງ​ທີ 9 ທີ່​ຈະ​ໄຂ​ຂຶ້ນ​ໃນ​ຕົ້ນ​ເດືອນ​ພະຈິກ ທີ່​ຈະ​ມາ​ເຖິງ​ນີ້.

ນະ​ໂອກາດ​ທີ່​ມີ​ຄວາມ​ໝາຍ​ສຳຄັນ​ນີ້້, ຕາງໜ້າ​ໃຫ້​ຄະນະ​ປະຈຳ​ສະພາ​ແຫ່ງ​ຊາດ, ຂ້າພະ​ເຈົ້າ ຂໍ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ມາ​ຍັງ​ບັນດາ​ທ່ານ ສະມາຊິກ​ສະພາ​ແຫ່ງ​ຊາດ ທີ່​ໄດ້​ເດີນທາງ​​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້​ຢ່າ​ງພ້ອມພຽງ ​ແລະ ທັນຕາ​ມກຳນົດ​ເວລາ (ຂໍ​ຊົມ​ເຊີຍ).

ກອງ​ປະຊຸມ​ຂໍ​ສະ​ແດງ​ຄວາມ​ຂ່ຳນັບ​ຊົມ​ເຊີຍ ບັນດາ​ທ່ານ​ຜູ້ນຳ​ພັກ-ລັດ, ອົງ ການ​ຈັດ​ຕັ້ງ​ແນວ​ລາວສ້າງ​ຊາດ, ​ບັນດາ​ອົງການ​ຈັດ​ຕັ້ງ​ມະຫາຊົນ, ບັນດາ​ທ່ານ​​ແຂກ​ຜູ້​ມີ​ກຽດ​ທີ່​ໄດ້​ເຂົ້າ​ຮ່ວມ​ກອງ​ປະຊຸມ​ຄັ້ງ​ນີ້ (ຂໍ​ຊົມ​ເຊີຍ).

ບັນດາ​ທ່ານ​ທີ່​ນັບຖື ​ແລະ ​ຮັກ​ແພງ!

ຈຸດປະສົງ​ຂອງ​ກອງ​ປະຊຸມ​ສະ​ໄໝ​ວິສາມັນ​ຂອງ​ສະພາ​ແຫ່ງ​ຊາດ​​ໃນ​ຄັ້ງ​ນີ້ ​ແມ່ນ ຈະ​ໄດ້​ສຸມ​ໃສ່​ຄົ້້ນຄວ້າ ​ແລະ ພິຈາລະນາ​ແຜນການ​ພັດທະນາ​ໂຄງການ​ກໍ່ສ້າງ​ເສັ້ນ ທາງ​ລົດ​ໄ​ຟ ​ແຕ່​ດ່ານ​ບໍ່​ເຕັນ ​ແຂວງ​ຫຼວງ​ນ້ຳ​ທາ ຫາ ນະຄອນຫຼວງ​ວຽງ​ຈັນ ຕາມ​ການສະ​ເໜີ​ຂອງ​ທ່ານ​ນາຍົກລັດຖະມົນຕີ. ​ໂຄງການ​ສ້າງ​ເສັ້ນທາງ​ລົດ​ໄຟ ​ເຊິ່ງລັດ​ຖະບານ​ສະ​ເໜີ​ມາ​ຍັງ​ກອງ​ປະຊຸມ​ຄົ້ນ ຄວ້າ​ພິຈາລະນາ​ໃນ​ຄ້ັງນີ້ ​ແມ່ນ​ການ​ສືບ​ຕໍ່​ຈັດ​ຕັ້ງ​ຜັນ​ຂະຫຍາຍ​ຈິດ​ໃຈ​ເນື້​ອ​ໃນ ມະຕິ 9 ຂອງ​ພັກ ກ່ຽວ​ກັບ​ການ​ພັດທະນາ ພື້ນ​ຖານ​ໂຄງ​ລ່າງ ທາງ​ດ້ານ​​ໂຍທາ​ທິການ-ຂົນ​ສົ່ງ ​ໃຫ້​ສາມາດ ສະໜອງ​ຕອບ ຄວາມ​ຮຽກຮ້ອງ​ຕ້ອງການ ​ແຫ່ງ​ການ​ຂະຫຍາຍຕົວ  ທາງ​ດ້ານ​ເສດຖະກິດ-ສັງຄົມ ທີ່​ນັບ​ມື້​ເພີ່ມ​ຂຶ້ນ​ສູງ​ໃນ​ປັດຈຸບັນ ກໍ​ຄື​ໃນ​ໄລຍະ​ຍາວ ​ເພື່ອ​ແນ​ໃສ່​ຍົກ​ສູງ​ປະສິດທິ​ຜົນ​ຂອງ​ການ​ຜະລິດ, ທຸ​ລະ​ກິດ, ການ​ເອື້ອ​ອຳນວຍ​ຄວາມ​ສະດວກ​ໃນ​ການ​​ໄປມາຫາສູ່ ຂອງ​ປະຊ​າຊົນ ກໍ​ຄື ການ​ເຊື່ອມ​ຈອດ ກັບ​ບັນດາ​ປະ​ເທດ​ໃກ້​ຄຽງ, ສ້າງ​ປະຖົມ​ປັດ​ໃຈ ​ເພື່ອ​ຫັນ​ເປັນ​ອຸດສາຫະກຳ ​ແລະ ທັນ​ສະ​ໄໝ.

ສະ​ນັ້ນ, ຈິ່ງ​ເຫັນ​ໄດ້​ວ່າ ​ໂຄງການ​ສ້າງ​ເສັ້ນທາງ​ລົດ​ໄຟ​ຢູ່ ລາວ ຈິ່ງ​ມີ​ຄວາມ​ໝາຍ​ສຳຄັນ​ຍິ່ງ​ທາງ​ດ້ານ​ການ​ເມືອງ ​ແລະ ​ເສດຖະກິດ, ທັງ​ເປັນ​ປະຫວັດ​ການ​ໜຶ່ງ ທີ່​ບໍ່​ເຄີຍ​ມີ​ມາ​ໃນ​ປະຫວັດສາດ​ຂອງຊາດ​ລາວ​ເຮົາ​ໃນ​ຜ່ານ​ມາ, ທັງ​ເປັນ​ວິທີ​ການ​ແຫ່ງ​ການ​ເປີດ​ກວ້າງ, ການ​ຍົກ​ລະດັບ​ພື້ນຖານ​ໂຄງ​ລ່າງ​ທາງ​ດ້ານ​ການ​ຂົນ​ສົ່ງ ​ໃຫ້​ມີ​ຄວາມ​ທັນ​ສະ​ໄໝ, ຄົບ​ຊຸດ​ກວ່າ​ເກົ່າ ​ເພື່ອບໍ​ລິ​ການ​ຮັບ​ໃຊ້​ການ​ຜະລິດ, ທຸລະ​ກິດຂະ​ແໜງ​ການ​ຕ່າງໆ​ທີ່​ປິ່ນ​ອ້ອມ​ໃຫ້​ມີ​ການ​ຂະຫຍາຍຕົວ, ມີ​ເສັ້​ນທາງ​ເຊື່ອມ​ຈອດ​ທີ່​ສຳ ຄັນ​ໃນ​ການ​ພັດທະນາ​ເສດຖະກິດ​ເຂດ​ແຂວ້ນ ລະຫວ່າງ ບັນດາ​ແຂວງ​ພາກ​ເໜືອ-ພາກ​ກາງ ​ແລະ ພາກ​ໃຕ້ ​ແລະ ອື່ນໆ, ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະ ກິດ-ສັງຄົມ, ຮັບປະກັນວຽກ​ງານ​ປ້ອງ​ການ​ຊາດ-ປ້ອງ​ກັນ​ຄວາມ​ສະຫງົບ ​ແລະ ການ​ປົກ​ປັກ​ຮັກສາ​ສິ່ງ​ແວດ​ລ້ອມ,   ຊຶ່ງ​ທັງ​ໝົດ​ດັ່ງກ່າວ ຈະ​ເປັນ​ບາດ​ລ້ຽວທີ່​ສຳຄັນ​ໃນ​ການ​ພັດທະນາ​ປະ​ເທດຊາດ ​ແລະ ສັງຄົມ​ລາວ​ເຮົາ​ໃຫ້​ມີ​ໃ​ບໜ້າ​ໃໝ່.

ບັນດາ​ທ່ານ​ທີ່​ນັບຖື ​ແລະ ຮັກ​ແພງ!

​ເນື່ອງ​ຈາກ​ວ່າ​ໂຄງການ​ສ້າງ​ເສັ້ນທາງ​ລົດ​ໄຟ ​ເປັນ​ໂຄງການລົງທຶນ​ຂະໜາດ​ໃຫຍ່, ນຳ​ໃຊ້​ເຕັກນິກ​ທີ່​ທັນ​ສະ​ໄໝ, ການ​ສ້າງ​ໂຄງການ​ດັ່ງກ່າວ ພົວພັນ​ກັບ​ຫຼາຍ​ຂະ​ແໜງ​ການ​ທີ່​ປິ່ນ​ອ້ອມ, ພົວພັນ​ກັບ​ລະດັບ​ການ​ຄຸ້ມ​ຄອງ​ລັດ ທາງ​ດ້ານ​ການ​ເງິນ, ການ​ຄຸ້ມ​ຄອງ​ວິຊາ​ການ​ທາງ​ລົດ​ໄຟ ກໍ​ຄື ການຈັດ​ຕັ້ງ​ປະຕິບັດ​ແນວທາງ​ນະ​ໂຍບາຍ​​ແກ້​ໄຂ​ຄວາມ​ທຸກ​ຍາກ​ຂອງ​ປະຊາຊົນ, ການ​ປົກ​ປັກ​ຮັກສາ​ສິ່ງ​ແວດ​ລ້ອມ, ການ​ຮັກສາ​ສະ ຖຽນ​ລະ​ພາບທາງ​ດ້ານ​ການ​ເງິນມະຫາ​ພາກທາງ​ດ້ານ​ເສດຖະກິດ-ການ​ເງິນ ​ແລະ ອື່ນໆ. ສະ​ນັ້ນ, ​ໄປ​ຄຽງຄູ່​ກັບ​ການ​ຮັບ​ຟັງ​ການ​ລາຍ​ງານ​ຈາກ​ຜູ້ຕາງໜ້າ​ລັດຖະບານ, ການ​ປະກອບ​ຄວາມ​ເຫັນ​ຈາ​ກຜູ້ຕາງໜ້າ​ຄະນະ​ປະຈຳ​ສະພາ​ແຫ່ງ​ຊາດ​​ແລ້ວ, ຄະນະ​ປະຈຳ​ສະພາ​ແຫ່ງ​ຊາດ ຂໍ​ຮຽກຮ້ອງ​ມາ​ຍັງ​ບັນດາ​ທ່ານ ສະມາຊິກ​ສະພາ​ແຫ່ງ​ຊາດ ຈົ່ງ​ໄດ້​ສຸມ​ສະຕິ ປັນຍາ, ​ເຊີດ​ຊູ​ຄວາມ​ຮັບຜິດຊອບ​ການ​ເມືອງ​ໃນ​ການ​ຄົ້ນຄວ້າ ​ແລະ ປະກອບ​ຄວາມ​ຄິດ​ຄວາມ​ເຫັນ​ຢ່າງ​ມີ​ຈຸດ​ສຸມ ສະ​ເໜີ​ແນະ ທິດ​ທາງ, ນ​ະ​ໂຍບາຍ, ກົນ​ໄກ ​ແລະ ​ມາດ​ຕະການ​ທີ່​ສຳຄັນ ​ແລະ ຈຳ​ເປັນ​ຕ່າງໆ ​ເພື່ອ​ຮັບປະກັນ​ເຮັດ​ໃຫ້​ແຜນການ​ພັດທະນາ​ໂຄງການ​ກໍ່ສ້າງ​ເສັ້ນທາງ​ລົດ​ໄຟ ສາມາດ​ໄດ້​ຮັບ​ການຈັດ​ຕັ້ງ​ປະຕິບັດ​ຢ່າງ​ມີ​ໝາກຜົນ, ບົນພື້ນຖານ​ຮັບປະກັນ​ຜົນ​ປະ​ໂຫຍ​ດສູງ​ສຸດ ມາ​ສູ່​ປະຊາຊົນ ​ແລະ ປະ​ເທດ​ຊາດ. ພ້ອມ​ກັນ​ນີ້, ສະ​ເໜີ​ມາ​ຍັງ​ບັນດາ​ກະຊວງ ​ແລະ ພາກສ່ວນ​ທີ່​ກ່ຽວ​ຂ້ອງ ຈົ່ງ​ໄດ້​ເຂົ້າ​ຮ່ວມ, ຮັບ​ຟັງ​ການ​ປະກອບ​ຄວາມ​ຄິດ​ເຫັນ ຕໍ່​ກັບ​ບັນຫາ​ຕ່າງໆ ຊຶ່ງ​ພົວພັນ​ກັບ​ຂະ​ແໜງ​ການ​ ​ແລະ ອົງການ​ທີ່ກ່ຽວຂ້ອງ​ຂອງ​ຕົນ ​ເພື່ອ​ນຳ​ໄປ​ພິຈາລະນາ ​ແລະ ວາງ​ທິດ​ທາງ​ແກ້​ໄຂ ​ແນ​ໃສ່​ເຮັດ​ໃຫ້ການ​ພັດທະນາ​ໂຄງການ​ກໍ່ສ້າງ​​ເສັ້ນທາງ​ລົດ​ໄຟ ​ກາຍ​ເປັນ​​ແມ່​ແຮງ​ຊຸກຍູ້​ບັນດາ​ຂະ​ແໜງ​ການ​ຕ່າງໆ ທີ່​ປິ່ນ​ອ້ອມ​ໃຫ້​ມີ​ການ​ຂະຫຍາຍຕົວຢ່າງ​ຍືນ​ຍົງ.

ຄະນະ​ປະຈຳ​ສະພາ​ແຫ່ງ​ຊາດ ຫວັງ​ຢ່າງ​ຍິ່ງ​ວ່າ, ຜ່ານ​ການ​ຄົ້ນຄວ້າ, ພິຈາລະ ນາ​ລະອຽດ​​ຖີ່​ຖ້ວນ ​ແລະ ດ້ວຍ​ຄວາມ​ຮັບຜິດຊອບ​ສູງ​ຂອງ​ບັນດາ​ທ່ານ​ສະມາຊິກ​ສະ ພາ​ແຫ່ງ​ຊາດ, ກອງ​ປະຊຸມ​ຄັ້ງ​ນີ້ ຈະ​ສາມາດ​ພິຈາລະນາ ​ແລະ ຮັບຮອງ​ເອົາ​ໂຄງ ການ​ສ້າງ​ເສັ້ນທາງ​ລົດ​ໄຟ ​​ເພື່ອ​ມອບ​ໃຫ້​ລັດຖະບານ​ນຳ​ໄປ​ຊີ້​ນຳ ຈັດ​ຕັ້ງ​ປະຕິບ​ັດ​ໃຫ້​​ເກີດ​ຜົນ​ເປັນ​ຈິງ.

ນະ​ໂອກາດ​ອັນ​ສະຫງ່າ​ລາສີ​ນີ້, ​ໃນ​ນາມ​ປະທານ​ກອງ​ປະຊຸມ, ຂ້າພະ​ເຈ້ົາ ຂໍ​ປະ ກາດ​ໄຂ​ກອງ​ປະຊຸມ​ສະ​ໄໝວິສາມັນ​ຂອງ​ສະພາ​ແຫ່ງ​ຊາດ ຊຸດ​ທີ VII ຢ່າງ​ເປັນ​ທາງ​ການ​ນັບ​ແຕ່​ວິນາທີ​ນີ້​ເປັນ​ຕົ້ນ​ໄປ.

ຂໍ​ຂອບ​ໃຈ!

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / ປ່ຽນ )

Twitter picture

You are commenting using your Twitter account. Log Out / ປ່ຽນ )

Facebook photo

You are commenting using your Facebook account. Log Out / ປ່ຽນ )

Google+ photo

You are commenting using your Google+ account. Log Out / ປ່ຽນ )

Connecting to %s